Rojar Wenda

Rojar Wenda
Jidayikbûn	Qoser , Mêrdîn , Bakurê Kurdistanê
biguhêre

Rojar Wenda ( jdb. li Qoser , Mêrdîn , Bakurê Kurdistanê ) bloger û hunermendekî kurd e.

Jiyana wî

Di 1972'yan de li navçeya Qoserê ya bi ser bajarê Mêrdînê ve tê dinyê. Dûv re malbata wî vedigere gundê xwe, Xursa Navê. Ji salên dibistana seretayî ve, mîna gelek kurdên bakurê welat, bi zimanê tirkî dest bi nivîsandinê dike. Piştî ku dibistana navîn diqedîne, ji ber destengîya aborî dev ji xwendina dibistanê berdide û di sala 1987'an de dest bi nivîsandina helbestên kurdî dike û di sala 1988'an de, li gel birayên xwe diçe bajarê Stenbolê bi cih dibe.

Di sala 1992'an de, li gel mijûlahîya nivîsandinê, xwe bi xwe dest bi muzîka kurdî dike. Dîsa di heman salê de bi muzîkvan Yusuf Roman re hev nas dikin û li ser pêşnîyaza wî, bi derhênerîya Yusuf Roman, di albûma "Koma Geliyê Zîlan" ya bi navê "Dayika Delal" de, bi sê stranên xwe cih digre, her wiha straneke Xemgîn Bîrhat jî şirove dike.

Di sala 2000'an de, îca dest bi nîgarsazîya bi pênûsa risas dike. Li Stenbol bi tevahî sê pêşangehên kesane, ku ji xêz û karîkaturên xwe pêk tên vedike. Di vê navê de jibo çapkirin û weşana berhemên xwe serî li gelek komel,sazî û destgehên kurd -wekî kovar, rojname, enstîtu- dide, lê mixabîn ji tu yekan bersîvek erênî bi dest naxe.

Ji sala 2010'an bi vir ve, hemû berhem û nivîsên xwe, bi nivîskî bi rêya blogan parvedike, her wiha stran û helbestên xwe, hem werdigerîne zimanê tirkî, hem jî wan bi kurdî û tirkî şirove dike û ji malperên video parvekirinê re dişîne. Rojar Wenda hê li Stenbol dimîne û xebat û xizmeta xwe ya jibo çand û huner û zimanê kurdî didomîne.

Berhemên Rojar Wenda

Berhema çapkirî: wek ku venivîsîye(yazıldığı gibidir)helbest,kurdî/tirkî,kurgu kültür-ankara

Berhemên ne çapkirî:

• 490 helbest û ji van helbestan 370 stran û 98 ji wan helbestan, wergerandîye zimanê tirkî.
• 5331 Xal Kurdî-Kurdî Ferheng.
• Jînenîgarî(otobîyografî)
• 59 Kurteçîrok(Tirkî-Kurdî)
• 310 heb pêkenîyên Kurdî.

Mînakek ji helbestên wî

ROJARÎ (01.08.2010)

Agaheke reş hatîye

min digre mitale îroj

Xwedê nîne serê kesî

bi min çiqes tahle îroj

Jîyan zevîya kederan

ez lê bûme pale îroj

ji xwe diçim bi xwe ve têm

hilmek li min sal e îroj...

Zeryên me tev reş girêdan

ne zêr û xenxal e îroj

dê zarokên xwe davêjin

ne zar ne mindal e îroj

Agir bi canê min ketî

nayê peyv û zar e îroj

ciwan hatin serjêkirin

çem xwîna zelal e îroj...

Dayikan rû selixandin

ser bê pirç û pal e îroj

çar dewletên ji hev ne xweş

li dij me heval e îroj

Gund şewitîn erd talan bûn

me ne war û mal e îroj

Gîyan ket tatêla pestê

laş maye evdal e îroj...

Didim ber hev didim ser hev

dil bi nal û nal e îroj

ma bi hêsran çawa bişom?

keser kur newal e îroj

Li ber nehwirandina min

girî çi galgal e îroj?

di cih de li min qedîya

emrê ciwan kal e îroj...

Berî bidim çol û çîyan

zinar pişt û pal e îroj

ne dixwim ne jî vexdixwim

mistek li min çahl e îroj

Bêrî bûme ji omedyan

kes ne ap û xal e îroj

Bi kevirên reş ve neyê

nizam ev çi hal e îroj...

Her keç û xortekî Kurdan

rabûye şepal e îroj

çek û rext pêçane li xwe

li bejn û li bal e îroj

Ji bo vê xaka hezar sal

diqîr û dikale îroj

di şerê azadîyê de

Kurd Rustemê Zal e îroj...

Xeyala Welatê rojê

bi şewq û şemal e îroj

ketîye ber dest û piyan

ji wan re xêrmal e îroj

Li qada huner ev pênûs

şûrê ber mertal e îroj

bi du şanenavên wenda

navê xwe Bilal e îroj...

Girêdanên derve

• Malpera Rojar Wenda ^{Girêdana arşîvê 2016-03-05 li ser Wayback Machine}