Şîri Küeyî
 | Ev gotar bi zaravayê kurdiya kirmaşanî hatiye nivîsandin. |
Şîri küeyî ya pûma canewer gewreyg e ki zûrim le küeyl xwarîn Kanada û Amrîkay Xwarîn jiyey.
Şîri küeyî canewer giwandarîg e le xîzani pişî ye. Bîcige le wextîg minal e û ha lay daligî baqî imrî we tenya jiyey. Şîri küeyî hem xas tüenî wegerd dewrgirdi xwey dabay û hem îş xas tüenî le şew ya rûj şikar bikey. Pûma pay zûrdarîg dîrî ki hem erra girdin şikar xas e û hemîş tüenî ta 6 mitir baz biwey.
Pûma canewer gûştxwerîg e belam tenya erra zinî menin canewereyl tir şikar key. Pûma zûrim canewereyl büçigîg cûr müş, mel, mahî û xerûşk xweydin belam eger bikefîye desî pespûleylîg îş cûr kawirr û bizin şikar key. Pûma rrřa şikar kirdin xwey le naw dar û bincig şarîyew û wextîg we şikaregey nizîkew bû perrîye kûlî û ya wegerd çepük milî şiknî ya qep keye milî û xinkinîdey.
Herçen pûma xwey canewer şikarçîg e belam eger wexatir nexweşî ya zexmî bîn bîhazew bû tüenî bûwe şikar şikarçîeyl gewreyg cûr xirs û gurg ya tenanet pûmayil tirek. Î canewere dewrgird 12 sal jiyey belam birrîg le lîyan ta 25 sal îş jiyen.