Fanêle

Fanêleya bi zirkaş (fermûar)

Fanêle, kenze, vezele, fanêre (di hin devokan de fanorî) xwekirinek e. Tê refandin, ristin, heger biqelişe yan ziyan lê bikeve, bi tayê hemanrengî tê verişandin. Refandina wan dijwar e, dem û kedê divê. Ji ber wê, îro êdî pirranî di fabrîkan de tên çêkirin.

Fanêle ji navê berjor tê xwekirin, sing, pişt û milan pordike. Fanêle ji bo porkirin, germxwedîkirin tê bikaranîn lê herwiha aksesûarek e jî. Ji hirî, pembûyê tên refandin, di hilberîna wan de têkelên din jî tên bikaranîn. Li Kurdistanê ji ber sermayê fanêleyên biberstûk pirr dihatin ristin.

Ji Asyayê derbasê ewropayiyan bûye. Heya salên 1950'î fanêle wekî xwekirineke ji rêzê û bêqîmet dihate dîtin. Niha bi sedan cureyên wê di pêşbaziya bazara modayê de tên firotin.

Cureyên sereke yên fanêleyan

• Fanêleya troyayiyan, biberstûka wê heye, bi zirkaşê biberstûk tê girêdan, bi mil û stûr in
• Sermîntan (fanêle), bê mil, bê berstûk in, li ser mîntanên bi mil tên xwekirin
• Fanêleya ser singê, bi mil an bê mil in, jin li xwe dikin, kurt in, heya binê pêsîrê ne, zikê pornakin
• Fanêleyên bi kum, kumên wan pê ve ne
• Fanêleyên kaşûnbazan, kesên werzîşa kaşûnê (skî) dikin bikartînin
• Fanêleya gloverstûk, berstûkên wan nînin, herwiha pêşiya wan jî nayê vekirin, cihê serî tê re here glover in
• Fanêleya çekbendî, pêşiya wan tê vekirin, bi zirkaş (fermûar) an bişkojan tê qefaltin