Mohsen Namjoo

Mohsen Namjoo
Mohsen Namjoo, sal 2007
Jiyan
Jidayikbûn	1976 Turbeta Cem, Îran
Cureyê muzîkê	Muzîka folklorî ya îranî Rocka îranî muzîka akûstîk
Pîşe	Solîst
Amûr	Setar Gîtar
Malper	mohsennamjoo.com
biguhêre

Mohsen Namjoo (bilevkirin: Mohsin Nemcû; bi farisî: ‏محسن نامجو‎; jdb. 1976 li Turbeta Cem), stranbêj, muzîsyenê setarê û nivîskarekî îranî ye.

Kurtejiyan

Mohsen Namjoo di sala 1976an de li Turbeta Cem, li bajarekî biçûk ê li bakûrê rojhilatê Îranê, hate dinyayê û di hundirê malbateke gerdîşî de mezin bû. Namjoo ji zarokatiya xwe pê ve dildariya muzîk û edebiyatê ye. Lewra kêfa wî bi xwendina Quranê gelek dihat û ew wek kilambêjekî ciwan tevlî hinek çalakiyên hunerî dibe.

Perwerdehiya muzîkê

Wextê ku bavê wî jiyana xwe ji dest dide, Mohsen hê 12 salî ye. Dayik û birayê wî yê mezin biryar didin ku wî bişînin dibistaneke muzîkê. Mohsen li wir ji aliyê Nasrollah Massehpoor perwerdehiya muzîkê distîne. Malbata wî naxwaze ew bibe stranbêj, lê ew mala xwe barî Tehranê dike, da ku li zanîngeha Tehranê beşa muzîkê bixwîne. Bo ku serlêdana wî ji aliyê zanîngehê bê qebûlkirin, divê wî karîbane li enstrumanekê bixe. Ji ber rewşa xwe ya qels a aborî ew biryar dide ku hînî lêxistina setarê bibe.

Zanîngeh

Serlêdana wî ya bo zanîngeha Tehranê di sala 1994an de tê qebûlkirin. Bi vî havî Mohsen dest bi xwendina xwe ya muzîk û şanoyê dike. Ew di çarçoveya xwendinê de, xwe di derheqê zanista şanoyê û dramaya klasîk de agahdar dike û van tiştan ji bo kilam û xebatên xwe yên hunerî bikartîne. Ew bi awayê perwerdehiya klasîk a li zanîngehê ne dilxweş be jî, ew bi xwendina muzîkê berdewam dike. Piştî xebatên li ser muzîka îranî ya klasîk-kevneşopî ew dixwaze êdî xebatên ceribandinê/eksperîmantel bike. Lewra hewl dide ku muzîka îranî bi stîlên nûjên tevî hev bike. Lê mixabin fikir û ramanên wî yên nûjên ji aliyê gelek hêlan ve nayên qebûlkirin û dibin sedema pirsgirêkên bi meqamên fermî re.

Ji ber fikir û xebatên xwe yên mûjên û mustesna, ji ber şekla wî ya kilam gotinê û ji ber bikaranîna wî ya muzîka îranî ew di sêyemîn sala xwendinê de ji zanîngehê tê avêtin. Piştî vê yekê sê konserên wî yên li Tehranê hatin lidarxistin.

Kariyer

Ji sala 2000'an pê ve ew giranî dide muzîka rock û jazzê - û ew hewl dide her du stîlên muzîkê bi muzîka kevneşopî ya îranî bike yek. Encamên van ceribandinan ji etudên ku bi teknîka xirab hatine kişandine pêk tên. Hinek ji van qeydan li hemû welatê belaw dibin û digihêjin gelek guhdarvanên faris.

Di sala 2006an de Mohsen ji nû ve konserên mezin dide û ew ji bo Mîhrîcana Navneteweyî ya Fîlman li Rotterdamê ji bo mijara "Hotspot Teheran" wek hunermendê hilbijartî tê dawetkirin. Ev cara ewil e ku Mohsen hunera xwe pêşkêşî guhdarvanên xerîb dike. Konsera wî ya li Rotterdamê serdikeve û rastî gelek ecibandinan tê: Ew dibe mêvanê medyaya ewropayî û hevpeyvînekê dide radyoya holandî.

Mohsen Namjoo bi taybetî bi rêya belgefîlma bi navê "Sounds of Silence" (Dengên Bêdengiyê) xwe ji raya giştî ya navneteweyî re dide nasîn. Fîlmê ku ji derhênerên Amir Hamz û Mark Lazarz hatiye amadekirin, bi taybetî muzîka 'binax'/underground a Tehranê dide nasîn. Di vê fîlmê de muzîsyenên îranî yên wek O-Hum, Hich-Kas û Bonakdar jî tên pêşkêşkirin.

Cezayê zindanê

Mohsen Namjoo di sala 2009'an de ji ber kêmxistina Quranê mehkûm bû û 5 sal cezayê zîndanê lê hate dayîn.

Namjoo stranek li ser Quranê kişandibû, di nava stranê de hinek hevokên ji pirtûka Quranê yek bi yek derbas dibin. Pisporê Quranê yê bi navê Salîmî Namîn bi îdiaya ku Namjoo 'namûsa Quranê xerab kiriye' doz lê vekiribû. Ji ber vê yekê dadgeha îranî di sala 2009'an de hunermend mehkûm kir. Dadgehê eşkere kir ku wî hin qit'eyên Quranê bi 'awayeke ne kevneşopî' kişandiye û bi vî rengî pirtûka pîroz a misilmanan (Quranê) biçûk xistiye.

Namjoo bi xwe ji ber strana xwe lêborîn xwestibû.

Dîskografî

• Toranj
• Damad Bad
• Jabr-e Joghrafiyai
• Damavand
• Gis
• Jabr
• Duzakh
• Morgh-e Sheyda
• Oy
• Alaki
• Trust the Tangerine Peel

Girêdanên derve

 Li Wikimedia Commons medyayên di warê Mohsen Namjoo de hene.

• Nûçeyek ji New York Times derbarê Mohsen Namjoo

Kilam

• Shîrîn shîrîn e (bi kelhurî) li ser Youtubê